truetamilnews.com

கடலூர், நாகை, திருவாரூர், மயிலாடுதுறை மாவட்டங்களில் புயல் வெள்ளம் பாதித்த பகுதிகளை நேரில் பார்வையிடுவதற்காக முதல்வர் இரு நாள்கள் பயணமாக இன்று செல்கிறார்.

edappadi palanisamy

நிவர், புரேவி என ஒரு வார இடைவெளியில் இரண்டு புயல்களை தமிழகம் பார்த்துள்ளது. புயலால் பெரியளவில் சேதம் ஏற்படாவிட்டாலும் கனமழையால் மீண்டும் கடலூர் அதிகளவில் பாதிக்கப்பட்டுள்ளது.

புயலோ, மழையோ, வெள்ளமோ தமிழகத்தை நோக்கி எந்தப் பாதிப்பு வந்தாலும் சிக்கலில் உடனடியாக மாட்டுவது கடலூர் மாவட்டம் தான். கடலூர் மாவட்ட விவசாயிகளின் குடிசைகளைத் தான் ஒவ்வொரு புயலும் சூறையாடியுள்ளன. இந்த முறை பெய்த தொடர் கனமழையால் கடலூர் மாவட்டமே தண்ணீரில் அல்லல்படுகிறது.

அதேபோல் டெல்டா மாவட்டங்களிலும் பிற வட மாவட்டங்களிலும் பெய்த கனமழையால் பயிர்கள் தண்ணீரில் மூழ்கின. வீடுகளுக்குள் தண்ணீர் சென்றதால் மக்கள் நிவாரண முகாம்களில் தங்கவைக்கப்பட்டுள்ளனர்.

இந்நிலையில் பாதிக்கப்பட்ட பகுதிகளை நேரில் ஆய்வு செய்வதற்காக முதல்வர் எடப்பாடி பழனிசாமி இரண்டு நாள்கள் பயணமாக கடலூர், நாகை, திருவாரூர், மயிலாடுதுறை மாவட்டங்களுக்கு பயணம் மேற்கொள்கிறார்.

தமிழ்நாட்டில் கடந்த இரு நாள்களாக வெள்ள சேதங்களை முழுமையாக பார்வையிட்ட மத்திய குழுவினர் இன்று (டிசம்பர் 8) காலை 10.30 மணிக்கு சென்னை தலைமைச்செயலகத்தில் முதல்வர் எடப்பாடி பழனிசாமியை சந்தித்து ஆலோசனை நடத்துகின்றனர். இந்த சந்திப்புக்கு பிறகு காலை 11.30 மணிக்கு எடப்பாடி பழனிசாமி, வெள்ள சேதங்களை பார்வையிடுவதற்காக காரில் கடலூர் புறப்பட்டு செல்கிறார்.

ஏற்கனவே, கடந்த மாதம் 26ஆம் தேதி நிவர் புயல் பாதிப்புகளை பார்வையிட எடப்பாடி பழனிசாமி கடலூர் சென்றிருந்தார். தற்போது, 10 நாள்கள் இடைவெளியில் மீண்டும் அங்கு செல்கிறார்.

இன்று மதியம் முதல் கடலூர் மாவட்டத்தில் பல்வேறு இடங்களுக்கு சென்று புயல் மற்றும் வெள்ள பாதிப்புகளை பார்வையிடுகிறார். தொடர்ந்து மாவட்ட ஆட்சியர், அதிகாரிகளுடன் ஆலோசனை நடத்துகிறார். அதன்பின்னர், சிதம்பரம் பகுதியில் பாதிப்புகளை பார்வையிடும் அவர், இரவு நாகப்பட்டினம் செல்கிறார்.

இன்று இரவு நாகப்பட்டினத்தில் தங்கும் முதல்வர், நாளை (டிசம்பர் 9) காலை 7.30 மணிக்கு நாகை மாவட்டத்திலும், முற்பகலில் திருவாரூர், நன்னிலம் பகுதியிலும், பிற்பகலில் மயிலாடுதுறை சீர்காழி பகுதியிலும் சேதப்பகுதிகளை பார்வையிடுகிறார். நிவாரண முகாம்களில் தங்க வைக்கப்பட்டுள்ள மக்களையும் சந்தித்து, நிவாரணப் பொருட்களை வழங்குகிறார். அதன்பிறகு, காரிலேயே சென்னை திரும்ப உள்ளார்.

Leave a Reply

Your email address will not be published. Required fields are marked *

Translate »
Enable Notifications    OK No thanks