truetamilnews.com

தமிழ்நாட்டைப் பொறுத்தவரை அரசியலையும் சினிமாவையும் பிரிக்கமுடியாது என்றுகூறலாம். நடிகர்களைப் போல முதல்வர்களையும் உற்பத்தி செய்க்கிறது கோலிவுட் என்ற விமர்சனம் உள்ளது. சமீபத்திய வரவாக கமல்ஹாசன் அரசியலுக்கு நுழைந்துள்ளார். வந்த வேகத்தில் மக்களவைத் தேர்தலில் போட்டியிட்டு குறிப்பிடத்தக்க வாக்குகளையும் பெற்றுள்ளார்.

நீண்டகாலமாக வருவாரா, வரமாட்டாரா என யூகங்களை கிளப்பி வரும் ரஜினிகாந்தை சத்தமில்லாமல் முந்தி வந்தார் கமல்ஹாசன். இந்த சட்டமன்றத் தேர்தலில் உறுதியாக களமிறங்குவேன் என ரஜினியும் அவரது ஆதரவாளர்களும் கூறிவருகின்றனர். இது ஒருபுறமிருக்க மற்றொரு நடிகரையும் இந்தத் தேர்தலுக்கு எதிர்பார்க்கலாம் என்கின்றனர் கோடம்பாக்கத்தினர்.

சினிமா டூ அரசியல் ரேஸில் ரஜினிக்கு அடுத்தபடியாக யூகிக்கப்படுபவர் விஜய். ரஜினி திரைப்படங்கள் மூலமாக எவ்வாறு தனது ரசிகர்களுக்கு அரசியல் ரூட்டை காட்டினாரோ அதே போல் விஜய்யும் சில படங்களில் ரசிகர்களுக்கு அந்த பாதையை காட்ட முயற்சிக்கிறார் என்ற விமர்சனம் உள்ளது.

இந்நிலையில் விஜய்யின் தந்தை எஸ்.ஏ.சந்திரசேகர் டெல்லி வழக்கறிஞர் ஒருவரிடம் பேச்சுவார்த்தை நடத்தியுள்ள தகவல் வெளியாகியுள்ளது. கட்சியை பதிவு செய்யும் பணிகளை திறம்பட செய்யும் டெல்லி வழக்கறிஞர் ஒருவரை சந்திர சேகர் சென்னை வரவழைத்து தனது வீட்டில் பேசியுள்ளார். இந்த நபர் ஆரம்பத்தில் ரஜினிகாந்துக்கு ஆலோசனை வழங்கியவர் என்றும் பின்னர் ரஜினி வேறொரு வழக்கறிஞரை நாடினார் என்றும் கூறப்படுகிறது.

கொரோனா நெருக்கடி உள்ள சூழ்நிலையில் அவசர அவசரமாக டெல்லி வழக்கறிஞரை அழைத்துப் பேசியிருப்பதால் விரைவில் கட்சியை பதிவு செய்து, வரும் சட்டமன்றத் தேர்தலிலேயே களம் காணத் தயாராகிறார்களா என்ற கேள்வியும் எழுந்துள்ளது.

சட்டமன்ற தேர்தல் பணிகளில் கட்சிகள் மும்முரமாக ஈடுபட்டு வருகின்றன. கூட்டணி பேச்சுவார்த்தைகள் திரைமறைவில் நடைபெற்று வருகின்றன. ரஜினி களத்திற்கு வருவது 100 சதவீதம் உறுதியானால் இரு பிரதான கட்சிகள் போடும் கூட்டணி கணக்குகள் மாறும் என எதிர்பார்க்கப்படுகிறது. இந்நிலையில் விஜய்யை மையமாகக் கொண்டு வெளியாகியிருக்கும் கட்சி பதிவு தகவல் அரசியல் களத்தில் மேலும் சூட்டைக் கிளப்பியுள்ளது. 

Leave a Reply

Your email address will not be published. Required fields are marked *

Translate »
Enable Notifications    OK No thanks