truetamilnews.com

கொல்கத்தா நைட் ரைடர்ஸ் அணியைச் சேர்ந்த வருண் சக்ரவர்த்தி, சந்தீப் வாரியர் இருவருக்கும் நேற்று கொரோனா உறுதி செய்யப்பட்டது. அதனைத் தொடர்ந்து சென்னை சூப்பர் கிங்ஸ் அணி தலைமை நிர்வாக அதிகாரி காசி விஸ்வநாதன், பயிற்சியாளர் லட்சுமிபதி பாலாஜி ஆகியோருக்கும் தொற்று உறுதியானது. இதனால், ஐபிஎல் தொடர் தொடர்ந்து நடைபெறுவதில் சிக்கல் ஏற்பட்டுள்ளது. மேலும், வெளிநாட்டு வீரர்கள் அச்சத்தில் இருப்பதாகவும் தகவல் கிடைத்துள்ளது.

விமான போக்குவரத்திற்கு தடை:

இந்தியாவில் கொரோனா தாக்கம் அதிகரித்து வருவதால், உலக நாடுகள் பல இந்தியாவில் இருந்து புறப்படும் விமானங்களுக்குத் தடை விதித்துள்ளது. ஆஸ்திரேலிய அரசும் இந்திய விமானங்களுக்கு மே 15ஆவது தடை விதித்துள்ளது. தடையை மீறி ஆஸிக்குள் நுழையும் நபர்களுக்கு 5 ஆண்டுகள் வரை சிறைத் தண்டனை விதிக்கப்படும் எனவும் அந்நாட்டு அரசு அறிவித்துள்ளது. இதனால், ஐபிஎல் தொடரில் பங்கேற்றுள்ள ஆஸ்திரேலிய வீரர்கள் அச்சத்தில் இருப்பதாகத் தெரிகிறது. தற்போது, ஐபிஎல் தொடர் ரத்து செய்யப்பட்டாலும் கூட, வீரர்களால் ஆஸிக்குள் நுழைய முடியாது. இந்தியாவில்தான் தங்கியிருக்க வேண்டும். விமான போக்குவரத்திற்கான தடையை ஆஸி அரசு நீக்கப்பிறகே வீரர்கள் அங்குச் செல்ல முடியும்.

அணி உரிமையாளர் பேட்டி:

இந்நிலையில், ஐபிஎல் தொடர் தொடர்ந்து நடைபெறுமா என்ற கேள்விக்குப் பதிலளித்த அணி உரிமையாளர் ஒருவர், “ஐபிஎல் 14ஆவது சீசன் பாதி கட்டத்தைக் கடந்துவிட்டது. இனிமேல், தொடரை ஒத்துவைக்க வாய்ப்பில்லை. எஞ்சிய போட்டிகளை சுமுகமாக நடத்துவது தொடர்பாக பிசிசிஐ ஆலோசனை நடத்தி வருகிறது” எனத் தெரிவித்தார்.

“வருண் சக்ரவர்த்தி, மருத்துவ பாதுகாப்பு வட்டத்தை விட்டு வெளியேறியதுதான் கொரோனா பரவியதற்குக் காரணம். அணி உருவாக்கிய மருத்துவ பாதுகாப்பு வட்டத்திற்குள் கொரோனா பரவவில்லை. அவர் யாருக்கும் தெரியாமல் வெளியே சென்று வந்ததுதான் தொற்று பரவியதற்கு முக்கிய காரணம். இனிமேல் இதுபோன்ற தவறு நடைபெறாத வண்ணம் நடவடிக்கை எடுக்கப்படும். கொரோனா பாதித்த வீரர்களை தனிமை முகாமிற்கு அனுப்பிவிட்டு, போட்டிகளைத் தொடர்ந்து நடத்த வேண்டும். வெளிநாட்டு வீரர்கள் பிரச்சினைகள் இல்லாமல் நாடு திரும்பும்வரை அவர்களுக்கு வேண்டியதைச் செய்வோம்” எனக் கூறினார்.

இதன்மூலம், ஐபிஎல் தொடர் தொடர்ந்து நடைபெறுவது கிட்டதட்ட உறுதியாகிவிட்டது. நேற்று கொல்கத்தா, ஆர்சிபி அணிகளுக்கு இடையிலான ஆட்டம் ரத்து செய்யப்பட்ட நிலையில், இன்று சன் ரைசர்ஸ் ஹைதராபாத், மும்பை இந்தியன்ஸ் அணிகளுக்கு இடையிலான போட்டி நடைபெறவுள்ளது.

Leave a Reply

Your email address will not be published. Required fields are marked *

Translate »
Enable Notifications    OK No thanks